ديوان الشاعر سداح العتيبي

أنا كـل مـا هبّـت علـى صـدري الانسـام=تعافـت حشاشـة جوفـي وزانـت اخلاقـي
دفعنـي لذعـذاع الهـوى مصـدر الإلـهـام=وبيّـنـت مــا خبيـتـهـا داخـــل اعـمـاقـي
يا كثر الورق في ساحة الشعر والاقـلام=عساهـا تشـب اقلامـي وتحـرق اوراقـي
تــدور الليـالـي .. بالعمـالـق وبـالأقـزام=وتثبت وأنـا ثابـت و واقـف علـى ساقـي
يـا هدهـد سبـا دام النبـا مـن جنابـك هـام=تسـدّ المهمّـه مـن علومـك عــن البـاقـي
ليا مات ابـو عمـار مـا مـات ابـو عـرام=يـدوم البقـاء فـي قايـد ٍ يـعـدل السـاقـي !
يقولون حظك يا العرب طاح مدري قـام=وأنـا أقـول مـن غيبوبـة النـوم مـا فاقـي
في تونس ومصر وليبيا واليمـن والشـام=الأخبـار مصحوبـه بتفصـيـل مــا لاقــي
بعد قامت الثورات تزحف علـى الظـلاّم=أشـوف المصايـب تهـدم المنـزل الراقـي
يا كثر العباير من مسيـل الدمـوع السـام=ويا كثـر الجنايـز مـن فشـق كـل فشاقـي
شعوب ٍ طواها الضيم من سطوة الحكام=تــدوّر كرامتـهـا .. ورا هـقـوة الـهـاقـي
ومن تسقطه تطلب علـى راسـة الاعـدام=وللسّجـن ابــو ضـبّـه ومفـتـاح ينسـاقـي
كذا شرع ربي من يضيـم البشـر ينضـام=دساتيـر حكـام العـرب طـاق طربـاقـي !
عسى الله يعز اللـي رفـع رايـة الاسـلام=علـى العـدل والمعـروف والعـز خفاقـي

يـا حبيـب الـروح علّمـنـي عـلامـك=لا يـمـوت الـحـبّ والأحـبـاب حـيّـه
لـك ثـلاث شـهـور متغـيّـر نظـامـك=والـعـلاقـه بـيـنـنـا مـاهـيــب هــيّــه
بـعـد كـانـت حامـيـه قــلّ إهتمـامـك=وأصبحت من سبّتـك ثلـج إبرديّـه !!
مرّنـي طيفـك ولا وصّــل سـلامـك=لـيــه مـــا وصـيّـتـه يـسـلّـم عـلـيّـه
يقـرع بصـدري مـن البـارح كلامـك=جارحـه بعـض الحـروف الأبجـديّـه
لا تساومنـي عـلـى بـاقـي غـرامـك=خـذ مـا تبـغـى مـنـه والـذمّـه بـريّـه
أتواضع معـك لجـل اكسـب هيامـك=وانـت تسبـح فـي بحـور النرجسـيّـه
من غصن قلبي بعد طـارن حمامـك=غــنّ معـهـا بالـلـحـون السـامـريّـه
كـان ودك بالفـراق أربــط حـزامـك=وعلّق الذكـرى علـى ورك المطيّـه
قــوم يــا قلـبـي وعــز الله مـقـامـك=مـا تعـيـش الــذل وعـزومـك قـويّـه
أترك اللـي خمّـك وسمّـك وضامـك=وأن خسرته تكسب النفس الرضيّه !

أنـا مالـي ومـال الملاقيـف يــا مـمـدوح=عــن الـلـي تلـقّـف سيـرتـي لا تعلّمـنـي
سوالف على درب النميمه تجي وتـروح=علامـك تليّمهـا وهـي .. مـا تلايمـنـي !
تشـب القلـوب المبغضـه نارهـا وتـفـوح=وتـرجـع هـبــاء مـنـثـور والله يسلّـمـنـي
وصلك الخبر وأم العبر راسهـا درمـوح=وفـي كـل ليلـه تدهـن الـراس بالسمـنـي
لا قام يتسلتح في زمـان الرخـاء سلتـوح=مقامـي سمـا .. والسلتـحـه مــا تطمّـنـي
يا كثر اللحون اللي تناسب حمـام الـدوح=ويا قلّ الهجوس اللي على البدع تلهمني
أحـوف الحمـى والذايـقـه بابـهـا مفـتـوح=حكمت الثمينـه والرخيصـه مـا تحكمنـي
تشبّعت .. وأغنتني عن الشاعر المملوح=قصايـد خلـف هـذال ومـفـرح الضمـنـي

ليه يا بنت العـرب مـا تحجبيـن الصـوره=يوم صوّرتي عرضتي صورتـك عريانـه
لــو تثيـريـن الغـرايـز منـتـي بمشـكـوره=سلعـة اللحـم الرخـيـص البـايـره منهـانـه
في شرفك اهل الدسايس يلعبـون الكـوره=ومـن يشوتـك عـن مجالـه قافـل ٍ بيبـانـه
والخبيث اللي يحوفك ما صدق بشعـوره=كان بابك مـا انفتـح لـه طـق بـاب فلانـه
خلي اسلوب البهايم واخرجي عن طوره=مكـرمـك ربــك بعقـلـك منـتـي بحيـوانـه
عيب لا والله حرام وعيـب يـا شحـروره=ماغدى بـك غيـر قولـة عاشـت الفنانـه !!
عرض كام وجمع آثام وصورة ٍ منشوره=صيـدة ٍ صيادهـا لاش وضعـيـف إيمـانـه
خافي من اللـي يحـبّ المسلمـه مستـوره=قبـل تحجـز لـك ذنوبـك فـي جهنّـم خانـه